咦？仲可以報名？你係咪睇錯？

你無睇錯，OC報名日期將會延長，要報名就快啲喇！

隨着OC舉行的時間愈來愈近，市民查詢的電話就愈來愈多，其中一個經常會問到，而我地全部負責同事都估唔到的一個問題竟然係：「活動當日有無嘢食呢？ 」

野外定向消耗大家咁多體力，又可能响寒冷天氣下玩，我地當然會錫住大家，為大家ｏ既肚皮著想喇！活動當日，我地為你安排咗：
 
食物一：清水！
（～跑到身水身汗，飲番枝水補充流失水份！）
食物二：香蕉！
（～迅速補充體力，專業運動員做完劇烈運動都係食佢咋！）
食物三：雞蛋！
（～即場烚，熱辣辣！）

每年的蕉counter同雞蛋counter都係最受歡迎的地方，而响上年o既四度低溫下，熱辣辣的雞蛋簡直係大家ｏ既救星，一來可以食，二來可以用嚟做暖手包。上年我地特別搵嚟一班專業細心的女士義工們（有相為証，請看下圖！）負責烚蛋，每隻蛋烚o既時間都係啱啱好!好味到無話可說！上年我食個隻蛋仲係溏心嚟添！好感動！

女士烚蛋圖！

People mountain banana sea – 人山蕉海!

除咗有得玩，有得食之外，有時間的話，仲可以同我地的同事傾吓偈，了解吓我地的工作。有歡樂有趣味又有意義，一次過滿足晒三個願望，仲唔快啲參加？