多謝晒！多謝晒！無國界醫生野外定向的名額經已爆滿！無國界醫生仝人响呢度多謝晒大家ｏ既支持！

提提各位參賽者，記住响１月９日或之前遞交參加條件同意書,贊助表格及名單，如果唔係就會被取消參加資格ｏ架！

至於野外定向訓練課程同OC簡介會將會响嚟緊禮拜日係灣仔舉行，收唔到電郵通知ｏ既朋友請致電2959 4249同我哋ｏ既同事聯絡！

仲有兩個多禮拜就到OC，究竟OC响邊度攪呢？其實有唔少人都估到七八成，我都唔再賣關子嘞！OC舉行ｏ既地點就係....

梅窩！

上個星期OC同事去咗梅窩site visit。賽事中心將會設响未來的銀紫荊廣場，唔知响邊？咪即係梅窩市鎮廣場囉！

賽事中心──梅窩市鎮廣場。廣場位於梅窩市中心，由碼頭行五至十分鐘就到，鄰近梅窩市政中心同梅窩街市同各類型商舖，食早餐、買補給品、去洗手間、換OC衫都好方便！

至於野外定向賽區，我地當然唔可以透露得太多喇！就好似之前o既blog所講，當日大家除咗要行山路之外，仲會經過村落同文物古蹟，親近山水瀑布之餘仲有機會睇到式微行業ｏ既遺址，大家攤開地圖check一check的話，相信都唔難估到賽區所在。趁住今個禮拜六日天朗氣清，大家不妨去梅窩走一轉，預習一下！