重要溫馨提示：請留意各組別建議乘船時間！！！！ (無國界醫生野外定向 2009)

無國界醫生 | 14th Jan 2009 | 一般 | (170 Reads)

emotion OC就嚟到！係時候約定朋友集合地點同時間，以下有一個好重要的溫馨提示，係有關交通安排ｏ既，大家記住睇清楚，如果唔係就有機會趕唔切去比賽ｏ架！

我地可以從陸路同水路去梅窩。由於水路係一個較為普遍ｏ既選擇，所以我地一早經已同船公司聯絡，增加渡輪載客量。不過，星期日通常會有較多人入梅窩郊遊，為免大家去到碼頭先發現上唔到船，所以我地特別按不同參賽者的出發時間而編訂咗一個上船時間表：

船班次 (開船時間)	組別
8:00am	男、女子個人組 (11xxx, 21xxx),高級男、女子2人組 (12xxx, 22xxx)政府部門及公營機構盃組別 (6xxxx) 高級混合2人組 (32xxx)
8:30am	學界男、女子組 (51xxx, 52xxx)高級女子3人組 (23xxx)高級女子4人組 (24xxx)親子2人組 (42xxx)親子3人組 (43xxx)
9:00am	親子4人組 (44xxx)高級混合3人組 (33xxx)高級混合4人組 (34001-34129)商界盃組別 (74001-74094)
9:40am	商界盃4人組別 (74095-74140)高級混合4人組 (34130-34160)
10:20am	商界盃2人及3人組別 (72xxx, 73xxx)高級男子3人組 (13xxx)高級男子4人組 (14xxx)

我地強烈建議大家能夠跟住呢個時間表所編排ｏ既時間搭船。因為若然你早咗搭船的話，就有機會令到早過你參賽ｏ既人搭唔到船參加比賽；若然遲咗搭呢，你就有機會趕唔切比賽，所以大家記住check真啲，睇真啲自己應該幾時搭船呀！

其實，除咗搭船之外，你仲有其他交通工具選擇ｏ既： 1）於東涌市中心乘搭3M號巴士去梅窩，車程約45分鐘2）於東涌市中心乘的士前往梅窩，車費約$100。如果係4個賽員齊齊share都幾抵！比賽當日要留意交通安排之外，天氣方面都要小心啲。呢排連續幾日都凍到死，有啲擔心OC當日會好似上年咁得四度。不過，我啱啱check過天文台網站，話當日氣溫會有16至21度，陽光普照。即刻開心晒！不過梅窩始終係近海地方，有時海風吹過都幾凍o架，所以最好都係帶定風褸或者其他禦寒衣物嘞！

至於食物方面，我哋就預備咗香蕉、雞蛋同食水俾各位參賽者。不過，大家玩足兩個鐘頭劇烈運動之後，呢啲「小小ｏ既心意」未必足以餵飽大家，所以大家不妨帶定適量ｏ既食物同埋水，以備不時之需！

留言(1) | 引用(0)

[1]

祝安康！福壽康寧！！ . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

[引用] | 作者神奇小貓 | 24th Jun 2009 | [舉報垃圾留言]